Nókis rayonında ruwxıy salamatlıq orayınıń jańa qosımsha imaratı paydalanıwǵa tapsırıldı

Búgin, Nókis rayonı aymaǵında jaylasqan Respublikalıq qánigelestirilgen ruwxıy salamatlıq ilimiy-ámeliy medicina orayı Qaraqalpaqstan Respublikası filialınıń jańa qosımsha imaratı saltanatlı túrde paydalanıwǵa tapsırıldı.

Usı imarattıń ashılıw máresiminde Nókis rayonı hákimi Z.Zaytov, Qaraqalpaqstan Respublikası densawlıqtı saqlaw ministri M.Qurbonov, rayon prokurorı P.Xalmuratov, taraw qánigeleri, medicina xızmetkerleri hám nuraniylar qatnastı.

Ilaj dawamında shıǵıp sóylegenler mámleketimizde insan qádirin ulıǵlaw, xalıqtıń salamatlıǵın qorǵaw hám medicina tarawın bunnan bılay da rawajlandırıw mámleketlik siyasat dárejesine kóterilgenin ayrıqsha atap ótti. Sonday-aq, Prezidentimizdiń basshılıǵında densawlıqtı saqlaw sistemasında ámelge asırılıp atırǵan keń kólemli reformalar nátiyjesinde aymaqlarda zamanagóy medicina mákemeleri qurılıp atırǵanı, xalıqqa kórsetilip atırǵan medicinalıq xızmettiń sapası hám qamtıp alıwı kún sayın jaqsılanıp atırǵanı atap ótildi.

Jańadan qurılǵan qosımsha imarat oraydıń jumısın bunnan bılay da keńeytiw, nawqaslarǵa sapalı hám qolaylı medicinalıq xızmet kórsetiw imkaniyatların arttırıwǵa xızmet etedi. Imarat zamanagóy talaplar tiykarında qurılǵan bolıp, onda medicina xızmetkerleri ushın barlıq zárúr sharayatlar jaratılǵan. Xanalar keń hám jaqtı, zárúr medicinalıq úskeneler menen támiyinlengen.

Bunnan soń ilaj qatnasıwshıları jańa imarattı kózden ótkerip, medicina xızmetkerleri ushın jaratılǵan sharayatlar hám qolaylıqlar menen jaqınnan tanıstı.

Bul qosımsha imarat “Ashıq byudjet” portalı arqalı xalıqtıń baslaması tiykarında 1 milliard 344 million sum qarjı utıp alınıwı esabınan qısqa múddette qurıp pitkerildi.