Nókis rayonında 26-iyun – Xalıqaralıq náshebentlikke qarsı gúresiw kúni múnásibeti menen “Salamatlıq ushın 5000 qádem” akciyası ótkerildi

Hár jılı 26-iyun sánesinde pútkil dúnya júzi boylap Xalıqaralıq náshebentlikke qarsı gúresiw kúni keńnen belgilenedi. Usı sáne múnásibeti menen Nókis rayonında da keń kólemli profilaktikalıq úgit násiyat ilajları shólkemlestirildi.

Atap aytqanda, Nókis rayonı hákimligi, rayonlıq ishki isler bólimi hám Respublikalıq qánigelestirilgen ruwxıy salamatlıq ilimiy-ámeliy medicina orayınıń narkologiya xızmeti boyınsha Qaraqalpaqstan Respublikası filialı, sport mektebi menen birgelikte rayon orayında jaylasqan “Edige” xalıq mádeniy dem alıw baǵında ǵalabalıq ilaj bolıp ótti.

Akciyanıń maqseti – náshebentlik qurallarınıń insan ómiri hám densawlıǵına keltirip atırǵan zıyanı haqqında jámiyetshilikke maǵlıwmat beriw, salamat turmıs tárizin keńnen úgit-násiyatlaw, jas áwlad arasında náshebentlikke qarsı immunitetti qáliplestiriwden ibarat.