Náshebentlik hám narkojınayatlarǵa qarsı gúresiwge arnalǵan ushırasıw bolıp ótti

Nókis qalası Anasay MPJ da xalıq arasında náshebentlik hám narkojınayatlardıń aldın alıwǵa baǵdarlanǵan profilaktikalıq ushırasıwlar bolıp ótti.

Ózbekstan Respublikası Prezidentiniń 2025-jıl 3-noyabrdegi “Xalıqtıń densawlıǵın hám millet genofondın náshebentlik hám narkojınayachılıqtan nátiyjeli qorǵaw boyınsha kompleksli ilajlar haqqında”ǵı PP-207-sanlı qararınıń orınlanıwın támiyinlew maqsetinde Respublikalıq qánigelestirilgen ruwxıy salamatlıq ilimiy-ámeliy medicina orayınıń narkologiya xızmeti boyınsha Qaraqalpaqstan Respublikası filialı shıpakeri A.Djalilov hám Nókis qalalıq medicina birlespesi narkolog shipakerleri R. Seyilxanova, A. Kenjebaevalar profilaktikalıq ushırasıw ótkerdi.

Ushırasıw dawamında qánigeler tárepinen náshebentliktiń jámiyet hám jaslar turmısına unamsız tásiri, onıń densawlıq, ruwxıy dúnyaǵa hám keleshektegi ómirine keltiretuǵın zıyanı haqqında tolıq maǵlıwmatlar berildi. Sonday-aq, náshebentlik zatlar menen baylanıslı huqıqbuzarlıq hám jınayatlar ushın belgilengen nızamlı juwapkershilik sharaları boyınsha túsinikler berildi.

Ushırasıw sońında náshebentlik hám narkojınayatlarǵa qarsı gúresiw hámmemizdiń ulıwmalıq wazıypamız ekenligi, jaslar arasında huqıqıy sana hám juwapkershilikti arttırıw boyınsha usınday profilaktikalıq ilajlar turaqlı ótkeriliwi atap ótildi.