Zıyanlı ádetlerge qarsı aǵartıwshılıq ilajı bolıp ótti

Ózbekstan Respublikası Prezidentiniń 2025-jıl 3-noyabrdegi “Xalıqtıń densawlıǵın hám millet genofondın náshebentlik hám narkojınayachılıqtan nátiyjeli qorǵaw boyınsha kompleksli ilajlar haqqında”ǵı PP-207-sanlı qararınıń orınlanıwın támiyinlew maqsetinde profilaktikalıq ilajlar alıp barılmaqta.

Usı sheńberde Nókis qalasındaǵı 49-mektepte Respublikalıq qánigelestirilgen ruwxıy salamatlıq ilimiy-ámeliy medicina orayınıń narkologiya xızmeti boyınsha Qaraqalpaqstan Respublikası filialı qánigeleri narkolog shipaker A. Jalilov, feldsherler D.Perdebaev hám K.Atamuratov tárepinen oqıwshılar ushın ruwxiy aǵartıwshılıq-profilaktikalıq lekciya ótkerildi.

Ilaj dawamında jaslar arasında salamat turmıs tárizin qáliplestiriw, náshebentlik hám onıń insan salamatlıǵına unamsız tásiri hám basqa da zıyanlı ádetlerdiń awır aqıbetleri haqqında hár tárepleme maǵlıwmat berildi. Oqıwshılarǵa temalar boyınsha málimleme bukletleri tarqatılıp, soraw-juwaplar arqalı jedel sóylesiw alıp barıldı.

Bunday profilaktikalıq ilajlar jas áwladtı salamat, sanalı hám bárkamal etip tárbiyalawǵa xızmet etedi.