Náshebentlik hám narkojınayatlarǵa qarsı gúresiwge arnalǵan ushırasıw bolıp ótti

Nókis mámleketlik texnika universitetinde jas óspirimler arasında náshebentlik hám narkojınayatlardıń aldın alıwǵa baǵdarlanǵan profilaktikalıq ushırasıw bolıp ótti.

Ózbekstan Respublikası Prezidentiniń 2025-jıl 3-noyabrdegi “Xalıqtıń densawlıǵın hám millet genofondın náshebentlik hám narkojınayachılıqtan nátiyjeli qorǵaw boyınsha kompleksli ilajlar haqqında”ǵı PP-207-sanlı qararınıń orınlanıwın támiyinlew maqsetinde 2026-jılı 20-fevral kúni Nókis qalalıq medicina birlespesi narkolog shıpakeri R. Seyilxanova profilaktikalıq ushırasıw ótkerdi.

Ushırasıw dawamında qánigeler tárepinen náshebentliktiń jámiyet hám jaslar turmısına unamsız tásiri, onıń densawlıq, ruwxıy dúnyaǵa hám keleshektegi ómirine keltiretuǵın zıyanı haqqında tolıq maǵlıwmatlar berildi. Sonday-aq, náshebentlik zatlar menen baylanıslı huqıqbuzarlıq hám jınayatlar ushın belgilengen nızamlı juwapkershilik sharaları boyınsha túsinikler berildi. Dúnya júzlik mashqalaǵa aylanıp atırǵan xamde jasarıp baratırgan keselliklerdin biri bolǵan narkomaniya keselligi haqqında úgit nasiyat jumısları jas óspirimlerde asirese jas ospirim qızlar arasında shegiwshiliktiń kobeyip baratırǵanlıǵı bunıń aqıbetinde kızıǵıwshılıq penen qumar keltirip shıgarıwshı psixatrop zatlarǵa úyrenip kalıwdıń aldın alıw boyınsha tusinikler berildi.

Ushırasıw sońında náshebentlik hám narkojınayatlarǵa qarsı gúresiw hámmemizdiń ulıwmalıq wazıypamız ekenligi, jaslar arasında huqıqıy sana hám juwapkershilikti arttırıw boyınsha usınday profilaktikalıq ilajlar turaqlı ótkeriliwi atap ótildi.